BUBUHAN kaluarga Palui sudah puluhan tahun ini tapisah-pisah, ada nang di Kotabaru wan di Pulau Sambilan, ada nang di Guntung Papuyu, di bukit Loksado wan ada jua nang di Palingkau dan Barangas. Balum lagi nang di hulu sungai samasakali tapancar kahulu kahilir, ada nang masih bahubungan tapi ada jua langlam samasakali kadada buriniknya apa masih hidup atawa sudah mati.
Mandangar habar jalanan Banjarmasin ka Palangkaraya sudah tabuka maka Palui baniat handak mancari'i kaluarga nang ada di kalimantan tangah itu.
Baisukan itu Palui sudah tulak ka taksian mancari mutur jurusan ka palangkaraya itu.
Ujar supir ditakuni apakah handak nang ba ac atawa kada, apakah duduk nang dimuka atawa nang dibalakang, apakah duduk bahadap kamuka atawa nang bahiring karna ungkusnya kada sama. Karna macam-macam tarifnya, larang banar maka ahirnya Palui umpat mutur pik up barang nang ungkusnya sapambari haja.
"Kaya apa Lui di jalanan nang hanyar diulah itu, nyaman hajalah dijalani," ujar Garbus batakun.
"Maklumlah jalan hanyar diulah masih banyak nang badugul-gugul, batanah, babatu wan badabu. Balum lagi kita harus manyubarang dua talu kali naik punton karna jambatannya balum tuntung," sahut Palui.
"Napa nang paling takasan dalam parjalanan ikam itu Lui," ujar Tulamak umpat batakun.
"Karna wayah aku musim kamarau maka nang lucu imbah sampai kasitu bubuhan panumpang pina kada saling bapinanduan," ujar Palui.
"Apa sababnya?" Lui ujar Garbus.
"Samunyaan panumpang pina kaya urang walanda, rambut putih muha habang baju salawar pina suklat," ujar Palui. "Sababnya karna sapanjang jalan badabu kaya hujan garimis haja, ditambah pulang kabut wan ambum sampai saharian kada malihat matahari. Kaya itu jua bahinak asa ngalih karna karak hidung bakandal," ujar Palui.
"Lalu tatamulah ikam wan mamarina ikam nang di Basarang situ?"
"Alhamdulillah, imbah bapal-pal batakun hanyar tatamu, itupun jawabannya lucu banar bahwa rumah mamarinaku itu tandanya dipadahakan bakalambu suklat," ujarnya.
"Napa maksudnya rumah bakalambu, karna kalu kabiasaan kita kada rumah bakalambu tapi kalambu di rumah gasan kada kanyamukan wan kada kadinginan," ujar Tuhirang.
"Nah......itulah istimewanya rumah-rumah panduduk di Basarang situ ujar mamarinaku. Rumah sidin itu hatap sirap tawing wan lantainya ulin, palatarnya tegel wan lawang jandilanya bakaca samunyaan karna sidin tamasuk urang baduit jua," ujar Palui.
"Tapi kanapa rumah baik itu maka dikalambui?" ujar Garbus.
"Karna sidin sayang rumah itulah maka sidin kada sayang diduit manukar tarpal ganal bapuluh-puluh lambar gasan maulah kalambu rumah supaya kada badabu," ujar Palui sambil tatawa.
"Rumah kaluarga Palui ini tamasuk anih tapi nyata," sahut Garbus sambil mangalangkang umpat tatawaan. (bpt/mht)
Anda sedang membaca artikel tentang
Kada Badabu
Dengan url
http://banjarberita.blogspot.com/2013/12/kada-badabu.html
Anda boleh menyebar luaskannya atau mengcopy paste-nya
Kada Badabu
namun jangan lupa untuk meletakkan link
sebagai sumbernya
0 komentar:
Posting Komentar